ജയിക്കുക മഹാഭാഗാ
കല്ലിലും ശിവനെക്കണ്ടു,
കണ്ടു കണ്ണാടിയിൽ സ്വയം
കാഴ്ചയല്ല,തിലുൾക്കാഴ്ച
കാണുവാൻ കാട്ടിയാവഴി
തിമിരം മാറ്റുവാൻ കണ്ണിൽ
ശല്യക്രിയ നടത്തണം
ജ്ഞാനമാർജ്ജിക്ക,വിജ്ഞാനം
കാഴ്ചനേരാക്കി മാറ്റിടും
സമാധിസ്ഥഗുരോ,ഗീരി-
ന്നർത്ഥമിന്നുമറിഞ്ഞിടാ-
തെന്നും ചൊല്ലി നടന്നീടു-
‘ന്നപരന്നു സുഖ’ത്തിനായ്
മതമേതാകിലും തീർച്ച,-
യതിൽ ജാതികലക്കിടും
മദം പൊട്ടിയ രാഷ്ട്രീയ
മതേതര മഹോന്നതർ
ഇവരോടിന്നാരു ചൊല്ലും
‘ജനനീ നവമഞ്ജരി’
ഇവരാരിൽ നിന്നു കേൾക്കു-
‘മുപദേശ’ത്തിന്റെ നൂറുകൾ
ഇവരെയാര് കേൾപ്പിക്കും
‘കാളീനാടക’ വൈഭവം
ഇവർക്കായെന്നാരുപാടും
പാട്ടു’കുണ്ഡലിനി’പ്പൊരുൾ
‘നാവികൻ നീ ഭവാബ്ധി’ക്കെ-
ന്നങ്ങു പാടിച്ച കീർത്തനം
ആഴമേറും കയത്തിൽ വീ-
ണാർത്തരായ് കേണിടുന്നിവർ
ജയിക്കുക മഹാഭാഗാ
ജ്ഞാന വൈരാഗ്യ സാധകാ
ജനിക്കുക തെളിച്ചീടാൻ
ജ്ഞാനാനന്ദം ജഗത്തിതിൽ
9446530279
Author
