ഹോളിവുഡ് ഹിൽസിനെ കാട്ടുതീ വിഴുങ്ങുമ്പോള്‍…
ഓരോ ദുരന്തത്തെയും അപലപിച്ചുകൊണ്ടുതന്നെ, ഈ ദുരന്തം അമേരിക്ക ക്ഷണിച്ചുവരുത്തിയതാണെന്ന് പറയേണ്ടി വരുന്നതിന്റെ കാരണം പ്രകൃതിയുടെ സംരക്ഷണവിഷയങ്ങളില്‍ ആഗോളതലത്തില്‍ അമേരിക്ക എന്നും തുടര്‍ന്നുവന്നിട്ടുള്ള ഉദാസീനതയാണ്. ഇക്കഴിഞ്ഞ COP 29 ല്‍ പോലും അമേരിക്കയുടെ പങ്കാളിത്തം ഉറപ്പാക്കിയിരുന്നില്ല. നിയുക്ത പ്രസിഡന്റ് ഡൊണാള്‍ഡ് ട്രംപിന്റെ കാര്യമെടുത്താലും കാലാവസ്ഥാവ്യതിയാനവും, പ്രകൃതി സംരക്ഷണവുമൊക്കെ എല്ലാക്കാലത്തും അദ്ദേഹത്തിന്റെ താല്‍പര്യത്തില്‍ പെടുന്ന വിഷയം ആയിരുന്നില്ല .
അമേരിക്കയിലെ സമ്പന്നമായ ഒരു നഗരത്തെ തീവിഴുങ്ങിയ വാര്‍ത്ത ലോകത്തെ ഞെട്ടിച്ചിരുന്നു. രാജ്യത്തെ ഏറ്റവും ധനികരായവര്‍ താമസിക്കുന്ന, കോടികള്‍ വിലമതിക്കുന്ന സൗധങ്ങള്‍ നിറഞ്ഞ ഒരു നഗരം തീയില്‍ മുങ്ങിയിരിക്കുന്നു. ഈ ദുരന്തം അവസാനം വിരല്‍ചൂണ്ടുന്നത് പ്രകൃതിയോട് മനുഷ്യനുള്ള പ്രതിപാതിയിലേക്കുതന്നെയാണ്. പ്രകൃതിയ്ക്ക് ആരോടും വലിപ്പച്ചെറുപ്പമില്ല. തകര്‍ച്ചയിലൂടെ ഭൂമിയോളം താഴുമ്പോളും പിന്നാലെ ഒരു ഉയിര്‍ത്തെഴുന്നേല്‍പ്പ് ഭൂമിയ്ക്ക് സാധ്യവുമാണ്, അത് ഒഴിച്ചുകൂടാനുമാവില്ല. മനുഷ്യന്‍ ശാസ്ത്രത്തിന്റെയും സാങ്കേതികവിദ്യയുടെയും സഹായത്തോടെ കെട്ടിപ്പൊക്കിയ സൗധങ്ങള്‍ക്ക് സ്വയം സംരക്ഷിക്കപ്പെടാന്‍ അതില്‍ത്തന്നെ സംവിധാനങ്ങള്‍ ഉള്ളപ്പോലും പ്രകൃതിയുടെ താണ്ഡവത്തിനുമുന്നില്‍ അവയൊക്കെ എത്രയോ ദുര്‍ബ്ബലം. ലോകത്തെ ജയിച്ചുവെന്ന് നാം അവകാശപ്പെടുമ്പോളും പ്രകൃതി ഒന്ന് ആഞ്ഞു ഉറഞ്ഞുതുള്ളിയപ്പോള്‍ നിസ്സഹായരായത് ലോകത്തെ ഏറ്റവും ധനികരായ രാജ്യമാണ്. ലോകശക്തികള്‍ എന്ന് ലോകം വാഴ്ത്തുന്ന അമേരിക്കയാണ്. അയ്യായിരത്തിലധികം കെട്ടിടങ്ങളും, പതിനഞ്ചിലേറെ ആള്‍നാശവും ഒക്കെ റിപ്പോര്‍ട്ട് ചെയ്യപ്പെടുന്നു. . എന്തുകൊണ്ടാണ് ലോകത്തെ ഏറ്റവും പുരോഗതിയുള്ള രാജ്യത്തുപോലും ഇത്തരം അപകടങ്ങള്‍ സംഭവിക്കുന്നു? സംഭവിച്ചു കഴിയുമ്പോളും അതിനെ നിയന്ത്രണവിധേയമാക്കാന്‍ അവിടെയുള്ള സിസ്റ്റത്തിന് കഴിയുന്നില്ല.
ഹിരോഷിമ, നാഗസാക്കി
അമേരിക്ക, ജപ്പാനിലെ ഹിരോഷിമ, നാഗസാക്കി നഗരങ്ങളില്‍ ആറ്റംബോംബ് വിക്ഷേപിച്ചതിന്റെ എണ്‍പതാം വാര്‍ഷികമാണ് 2025. മനുഷ്യനിര്‍മ്മിതമായ ഒരു ആക്രമണത്തില്‍ ജപ്പാന്‍ എന്ന രാജ്യം തന്നെ തകര്‍ന്നടിഞ്ഞ ആ സംഭവത്തിന്റെ അലയൊലികള്‍ ഇന്നും ആ രണ്ടു നഗരങ്ങളില്‍ ആഞ്ഞടിച്ചുകൊണ്ടിരിക്കുന്നു. എണ്‍പതുവർഷങ്ങള്‍ക്കിപ്പുറം അന്ന് ചാരമായ നാഗസാക്കിയിലെയും ഹിരോഷിമയിലെയും ചിത്രങ്ങള്‍ ലോസ് ഏഞ്ചലസില്‍ കാട്ടുതീ വിഴുങ്ങിയ ഭൂമിയുടെ ചിത്രങ്ങളുമായുള്ള അപാരമായ സാമ്യം നമ്മെ എന്തെല്ലാമോ ഒക്കെ ഓര്‍മ്മിപ്പിക്കുകയാണ്.
മനുഷ്യന്റെ നശീകരണത്തിന് പ്രകൃതി നല്‍കുന്ന മുന്നറിയിപ്പുപോലെ, തിരിച്ചടിപോലെ. നാം ചെയ്യുന്ന കര്‍മ്മങ്ങള്‍ക്ക് തിരിച്ചടി ലഭിക്കുന്നത് ഇന്നോ നാളെയോ ആയിരിക്കില്ല. കാലത്തിന്റെ കാവ്യനീതിയെന്നു പറഞ്ഞാല്‍ അത് ദുരന്തത്തോടുള്ള സന്ധിചേരലായി വ്യാഖ്യാനിക്കപ്പട്ടേക്കാം. ഓരോ ദുരന്തത്തെയും അപലപിച്ചുകൊണ്ടുതന്നെ, ഈ ദുരന്തം അമേരിക്ക ക്ഷണിച്ചുവരുത്തിയതാണെന്ന് പറയേണ്ടി വരുന്നതിന്റെ കാരണം പ്രകൃതിയുടെ സംരക്ഷണവിഷയങ്ങളില്‍ ആഗോളതലത്തില്‍ അമേരിക്ക എന്നും തുടര്‍ന്നുവന്നിട്ടുള്ള ഉദാസീനതയാണ്. ഇക്കഴിഞ്ഞ COP 29 ല്‍ പോലും അമേരിക്കയുടെ പങ്കാളിത്തം ഉറപ്പാക്കിയിരുന്നില്ല. നിയുക്ത പ്രസിഡന്റ് ഡൊണാള്‍ഡ് ട്രംപിന്റെ കാര്യമെടുത്താലും കാലാവസ്ഥാവ്യതിയാനവും, പ്രകൃതി സംരക്ഷണവുമൊക്കെ എല്ലാക്കാലത്തും അദ്ദേഹത്തിന്റെ താല്‍പര്യത്തില്‍ പെടുന്ന വിഷയം ആയിരുന്നില്ല .
പാരീസ് ഉടമ്പടിയിലാണ് കാലാവസ്ഥാവ്യതിയാനത്തെപ്പറ്റിയുള്ള ചര്‍ച്ചകള്‍ക്ക് ഒരു ഗൗരവസ്വഭാവം കൈവരുന്നത്. പക്ഷേ അവിടെയുംആവശ്യക്കാര്‍ അതിന്റെ പ്രശ്നങ്ങള് അനുഭവിക്കുന്ന ദരിദ്രരാജ്യങ്ങള്‍ ആയിരുന്നു. വികസിതരാജ്യങ്ങള്‍ക്ക് ആവട്ടെ അതൊരു വിഷയമല്ലായിരുന്നു. കാരണം, അത്തരം പ്രശ്നങ്ങളെ ചെറുക്കാനുള്ള ടെക്നോളജി തങ്ങള്‍ക്കുണ്ടെന്ന് ആത്മവിശ്വാസമോ, അമിതവിശ്വാസമോ ഒക്കെയായിരുന്നു അവരെ നയിച്ചിരുന്നത്. എന്നാല്‍ ഈ ദുരന്താവസ്ഥയില്‍ അമേരിക്ക ഓര്‍ക്കുന്നതും പാരീസ് ഉടമ്പടി ആയിരിക്കും. പ്രകൃതിയുടെ കണക്കുപുസ്തകത്തില്‍ മനുഷ്യന്റെ അഹങ്കാരത്തിനോ, ധനത്തിനോ യാതൊരു സ്ഥാനവുമില്ല എന്ന വാസ്തവം അവര്‍ ഉള്‍ക്കൊള്ളുണ്ടാവും.
തുടക്കമിട്ടത്
ധനികര്‍ മാത്രം താമസിക്കുന്ന ലോകത്തെ ഏറ്റവും വിലകൂടിയ വീടുകള്‍ ഉള്ള അമേരിക്കയിലെ പ്രദേശമാണ് ഹോളിവുഡ് ഹില്‍സ്. 288 കോടി വിലവരുന്ന ഒരു വീട് കത്തിയമരുന്ന ചിത്രങ്ങള്‍ സോഷ്യല്‍ മീഡിയയില്‍ വൈറലാണ്. തീപിടുത്തത്തിന് തുടക്കമിട്ടതും, ഏറ്റവുമധികം നാശനഷ്ടം റിപ്പാര്‍ട്ട് ചെയ്യപ്പെട്ട സാന്ത മോണിക്ക, മലിബു കുന്നുകള്‍ ഉള്‍പ്പെടുന്ന പ്രദേശങ്ങളില്‍ കഴിഞ്ഞ കുറെ മാസങ്ങളായി മഴ ലഭിച്ചിട്ടില്ല. വരണ്ടകാലാവസ്ഥയാണ് അവിടെ അനുഭവപ്പെട്ടുകൊണ്ടിരുന്നത്. അതിനൊപ്പം അതിശക്തമായ കാറ്റുകൂടി വന്നതോടെ സ്ഥിതി കൂടുതല്‍ വഷളായി.
സാന്റാ ആന
തെക്കന്‍ കാലിഫോര്‍ണിയയില്‍ സാധാരണ ലഭിക്കുന്ന മഴയുടെ വെറും പത്തുശതമാനം മാത്രമാണ് ഇതുവരെ ലഭിച്ചിരിക്കുന്നത്. ഇത്തരത്തില്‍ മഴലഭിക്കാതെ വരണ്ട അവസ്ഥ തുടര്‍ന്നു. കൂടാതെ സാന്റാ ആന എന്ന കൊടുങ്കാറ്റാണ് കാട്ടുതീയുടെ തുടക്കം ഇട്ടതെന്ന് കരുതപ്പെടുന്നു. 112 കിലോമീറ്റര്‍ വേഗതയില്‍ വീശുന്ന ഇത് കൂടുതല്‍ പ്രദേശത്തെക്ക് തീ പടര്‍ത്തുവാനും കാരണമായി. ഓസ്‌കാര്‍ അവാര്‍ഡ് ചടങ്ങു നടക്കുന്ന ഈ തീയേറ്റര്‍, നാസയുടെ റോബോട്ടിക് ദൗത്യങ്ങള്‍ക്കു മേല്‍നോട്ടം വഹിക്കുന്ന ജെറ്റ് പ്രൊപ്പല്‍ഷന്‍ ലബോറട്ടറി എന്നിവയൊക്കെ കാട്ടുതീയുടെ ഭീഷണിയിലാണ്. രണ്ടരലക്ഷത്തോളം ആള്‍ക്കാരെയാണ് അവിടെനിന്നും മാറ്റി പാര്‍പ്പിച്ചിരിക്കുന്നത്. അയ്യായിരം കെട്ടിടങ്ങള്‍ നിലംപൊത്തിയപ്പോള്‍ ഏകദേശം അമ്പതു ബില്ല്യണ്‍ ഡോളറിന്റെ നഷ്ടമാണ് കണക്കാക്കപ്പെട്ടിരിക്കുന്നത്.
തിരിച്ചറിയേണ്ട
കാലാവസ്ഥാവ്യതിയാനം
ധനമോ, സാങ്കേതികവിദ്യയുടെയോ അറിവിന്റെയോ ഒക്കെ മുന്നേറ്റമോ ഒന്നുമല്ല ഒരു രാജ്യത്തിന്റെ ഔന്നത്യത്തെ നിശ്ചയിക്കുന്നത്; തിരിച്ചറിവാണ്. പാരിസ് ഉടമ്പടിയില്‍ മുന്നോട്ടുവച്ച കാലാവസ്ഥാവ്യതിയാനമെന്ന വാസ്തവത്തെ ഉള്‍ക്കൊള്ളാന്‍ ഇന്നും ധനികരാജ്യങ്ങള്‍ തയ്യാറായിട്ടില്ല. രണ്ടുമാസങ്ങള്‍ക്കുമുമ്പ് അസര്‍ബൈജാനില്‍ നടന്ന കോണ്‍ഫറന്‍സ് ഓഫ് പാര്‍ട്ടീസ് ഇരുപത്തി ഒന്‍പതാം പതിപ്പില്‍ ഏറെ പ്രധാനപ്പെട്ട ചര്‍ച്ചയായി മാറിയ കാലാവസ്ഥാവ്യതിയാനത്തെ ചെറുക്കാനായി പ്രവര്‍ത്തനങ്ങള്‍ ത്വരിതപ്പെടുത്തുവാനും സംങ്കേതികവിദ്യ നേടുവാനും ദരിദ്രരാജ്യങ്ങള്‍ക്ക് ധനസഹായം നല്‍കണമെന്ന പാരിസ് ഉടമ്പടിയില്‍ തീരുമാനം നടപ്പിലാക്കാന്‍ വികസിതരാജ്യങ്ങള്‍ തുടരുന്ന ഉദാസീനത ആ വലിയ ലക്ഷ്യങ്ങളില്‍ വിഘാതം സൃഷ്ടിക്കുകയാണ് ചെയ്തിരുന്നത്. അമേരിക്കയും ചൈനയുമടക്കമുള്ള രാഷ്ട്രത്തലവന്മാരുടെ അസാന്നിധ്യം കൃത്യമായ തീരുമാനങ്ങള്‍ കൈക്കൊള്ളുന്നതിന് തടസ്സവുമായി. ഒന്നും തങ്ങളെ ബാധിക്കുകയില്ലെന്നും തങ്ങളാണ് ലോകത്തെ വലിയ ശക്തികളെന്നുമുള്ള അമേരിക്കയുടെയും മറ്റുചില രാജ്യങ്ങളുടെയും ചിന്തകള്‍ക്ക് തിരിച്ചടിയാണ് ലോസ് ഏഞ്ചലസിലെ തീപിടുത്തത്തിലൂടെ പ്രകൃതി നിശബ്ദമായി മറുപടി നല്‍കുന്നത്.
അമേരിക്കന്‍ ഐക്യനാടുകളിലും കാനഡയിലും ഒക്കെ കാട്ടുതീ സാധാരണ പ്രതിഭാസമാണ്. അമേരിക്കയിലെ കണക്കെടുത്താല്‍ 2023 ല്‍ അവിടെ ഉണ്ടായത് 56,500 തീപിടുത്തങ്ങളാണ്. ഏകദേശം നാനൂറ് മുതല്‍ തൊള്ളായിരം ബില്യണ്‍ ഡോളറിന്റെ നഷ്ടം വരെ ഓരോ വര്‍ഷവും അമേരിക്കയില്‍ മാത്രം ഉണ്ടാകുന്നുണ്ട്. ഓരോ വര്‍ഷവും കാട്ടുതീമൂലം അവിടെയുണ്ടാകുന്ന നാശനഷ്ടങ്ങളുടെ കണക്കും കോടികോടിവരുന്നതായാണ് പഠനങ്ങള്‍ സൂചിപ്പിക്കുന്നത്. അശ്രദ്ധമായി ഉപേക്ഷിക്കപ്പെടുന്ന ക്യാമ്പ് ഫയറിന്റെ അവശിഷ്ടങ്ങള്‍, വലിച്ചെറിയപ്പെടുന്ന സിഗരറ്റ് കുറ്റികള്‍ എന്നിവയില്‍നിന്നുമാണ് കൂടുതലായുള്ള അപകടങ്ങള്‍ ഉണ്ടാകുന്നത്. എന്നാല്‍ ഇവിടെ ഇതൊന്നുമല്ല കാരണമായി ഉയര്‍ത്തിക്കാണിക്കപ്പെടുന്നത്, കാലാവസ്ഥാവ്യതിയാനം ആണ്. സാധാരണ ലഭിക്കേണ്ടിയിരുന്ന മഴയുടെ വെറും പത്തുശതമാനം മാത്രമാണ് ഈ സീസണില്‍ കാലിഫോര്‍ണിയയില്‍ ലഭിച്ചിട്ടുളളൂ. ഇക്കാരണം കൊണ്ടുതന്നെ കാട്ടുതീ ഉള്‍പ്പെടെ വരണ്ട കാലാവസ്ഥമൂലം ഉണ്ടാകാന്‍ സാധ്യതയുള്ള പ്രശ്നങ്ങള് മുന്നറിയിപ്പ് നല്‍കിയിരുന്നു. ഇത്രയേറെ മുന്നറിയിപ്പുകള്‍ നല്‍കിയിട്ടും കാലിഫോര്‍ണിയ ഗവര്‍ണ്ണര്‍ ആവട്ടെ ബജറ്റില്‍ ഇതിനായുള്ള ഫണ്ട് വെട്ടിക്കുറയ്ക്കുകയാണ് ചെയ്തത്. ഇത്രയേറെ ഉദാസീനമായ നടപടികള്‍ സ്വാഭാവികമായും ഇങ്ങനെയുള്ള പ്രശ്‌നങ്ങള്‍ക്ക് കാരണമായെങ്കിലേ അദ്ഭുതമുള്ളൂ. ഈ അതിരുകടന്ന മുന്നറിയിപ്പുകള്‍ ഇനിയും നാം തിരിച്ചറിയാതെ പോയാല്‍ അമേരിക്കയുടെ അത്രയും വികസിതമല്ലാത്ത നമ്മുടെ മറ്റു രാജ്യങ്ങളുടെ ദിനങ്ങള്‍ എണ്ണപ്പെടും എന്നകാര്യത്തില്‍ സംശയമില്ല.
9946199199
കാലാവസ്ഥാ വിപ്ലാഷ്
വരള്‍ച്ചയും കനത്തമഴയും മാറിമാറിവരുന്ന ഒരു വ്യത്യസ്തമായ കാലാവസ്ഥാരീതിയാണ് അവിടെ വില്ലന്‍ ആയതെന്നും പറയപ്പെടുന്നു. കാലാവസ്ഥാ വിപ്ലാഷ് (weather whiplash) എന്നാണ് അത്തരം അവസ്ഥയ്ക്ക് പറയുന്നത്. അതായത് നല്ല മഴ കിട്ടുകയും, അതിനനുസരിച്ചു വലിയെ രീതിയില്‍ പുല്ലുകള്‍ തഴച്ചുവളരുകയും ഉടന്‍തന്നെ വരണ്ട കാലാവസ്ഥയ്ക്ക് അവ വഴിമാറുകയും ചെയ്യുന്നു. ഈ വരണ്ട അവസ്ഥയാവട്ടെ കാട്ടുതീയ്ക്കും കാരണമാകുന്നു. ഇത്തരം തീവ്രമായ കാലാവസ്ഥയുടെ മാറ്റങ്ങള്‍ അവിടെ ജീവിക്കുന്നവര്‍ക്കും ബുദ്ധിമുട്ടുകള്‍ സൃഷ്ടിക്കാറുണ്ട്.
അമേരിക്കയിലെ ഏറ്റവും വലിയ രണ്ടാമത്തെ നഗരം, ഹോളിവുഡ് ഉള്‍പ്പെടെ ധാരാളം സിനിമാസംബന്ധിയായ സ്റ്റുഡിയോകളും മറ്റും സ്ഥിതിചെയ്യുന്ന ലോകത്തിന്റേതന്നെ വിനോദ തലസ്ഥാനം. ലോസ് ഏഞ്ചലസിന് ഇനിയുമേറെ വിശേഷണങ്ങള്‍ ഉണ്ട്. ജനുവരി ഏഴിന് തിരികൊളുത്തിയ തീ ഏകദേശം നാല്‍പ്പതിനായിരം ഏക്കര്‍ പ്രദേശമാണ് അഗ്‌നിയ്ക്കിരയായത്.
Author
